片酬 700萬嘅古仔，用 11萬包 6場，濕濕碎啦，片酬第 2高嘅君如用 9萬包 5場，亦算正常；就連初哥 Baby同城嫂都要各嘔萬 5，唔知佢哋片酬有冇廿萬呢？
篤極唔起
踢《花田》篤數屎橋 古仔君如 Baby城嫂貼錢包場
2010年02月24日農曆新年檔期，曾志偉導演嘅《 72家租客》同黃百鳴嘅《花田囍事 2010》「鍊」到行。直至上週六（ 20日）有無綫撐腰狂賣廣告勁谷宣傳嘅《 72家》，齋計香港票房贏足《花田》近千萬；話雖如此，其實《花田》老闆黃百鳴都絞盡腦汁谷票房，除咗自己泵水包一場，仲叫埋古仔、 Baby、熊黛林自己扲荷包包場催谷票房，難怪大贏家曾志偉都忍唔住寸嘴：「佢哋投入囉！」
賀歲片市民講來講去最 hit都係《花田囍事 2010》同《 72家租客》，《 72家》當然着數，有 TVB全天候供應廣告兼勁谷宣傳，黃百鳴都睇唔過眼：「如果我哋好似志偉套《 72家》咁宣傳，起碼要成千萬。」
迫扲荷包
《 72家》有曾志偉、張學友同袁詠儀孭飛，由於口碑好直至週一票房報 2千 3百萬，相反《花田》只得 1千 3百萬，當中仲起碼有 13場係《花田》演員自己扲荷包包場谷飛。據知《花田》上畫前，老闆黃百鳴已諗橋迫演員包場谷票房，片酬愈高包場次數愈多，知情者說：「古仔已經喺 5號同 6號包咗旺角百老匯每日 3場一共 6場，計埋要成 11萬，君如、 Baby、熊黛林都有包場呀，老闆自己嗰場就喺會展首映之前，佢話谷一谷頭段，收得好就會更多觀眾喎！」
太子走甩
咁開心！據知芸芸《花田》演員中，得鄭中基走得甩，唔使包場。
包場請朋友睇，大家開心啫！(真實對白)
總統戲院
旺角百老滙戲院
古仔朋友多
上週三，古仔出席《花田》春茗，一聽到包場兩個字就搵經理人（右）擋兼調頭。包場唔犯法 o架，搵到先使到嘛！
上週三（ 17日）《花田》兼黃百鳴旗下天馬電影公司春茗，身為老闆嘅黃百鳴就好理直氣壯咁話：「古仔、 Baby同我自己都有包場，可能古仔多朋友啦，包多幾場請朋友睇，新年大家開心。」問到《 72家》比《花田》收得，黃百鳴就暗寸：「佢哋宣傳真係好勁，好多電視明星，就連平時唔會去睇戲嘅師奶、阿毛、阿嬸都俾佢哋引咗出嚟，贏輸冇所謂，大家有錢賺咪得囉！況且我哋今年 5月仲有套大家都好期待嘅《詠春 2》同其他電影，最緊要觀眾撐港產啦！」一鋪唔代表生死，下年賀歲再砌過囉！
古仔包六場，君如透過電影公司冇否認包場一事，只係話：「唔想講！」而電影初哥 Angelababy亦要硬啃包 1場， Baby同城嫂經理人 Kim話：「呢啲係電影公司安排，個個有份， Baby唔係超級巨星，邊會花咁多錢包幾場呀，佢都係喺總統戲院包 1場請 fans睇啫！」
暗寸對家
正所謂你有張良計，我有過牆梯，谷票房個個方法都唔同，《花田》就要演員包場，而對頭《 72家》志偉就利用足 TVB嘅免費資源，狂谷廣告。雖然《花田》同《 72家》同時於 11日上映，但票房後來居上嘅《 72家》已贏近 1千萬，呢次真係矮仔多計嘞！對於對家嘅做法，《 72家》嘅演員仲似乎唔多認同添！
啲飛留畀觀眾買。
《花田》安排演員包場，翠翠撐《 72家》話：「志偉冇要我哋包場，大家唔同做法，啲飛都係留畀觀眾買啦。」
我哋真材實料！
聽到對家玩包場，高海寧都忍唔住寸句：「其他嘢就唔清楚喇！我淨係知我哋嘅成績係真材實料囉！」
初時以為兩套戲叮噹馬頭！(真實對白)
隔籬個院好多飛剩。(真實對白)
《 72家》贏幾個馬位，編、監、導兼演嘅曾志偉笑到見牙唔見眼，聽到對家包場橋即話：「古仔片酬咁高，我哋嘅演員冇佢咁多（片酬）。」接住女主角袁靚靚繼續暗寸：「我初時都以為兩套戲叮噹馬頭，今次真係承志偉貴言票房第一，我都諗過包場，不過太爆，連想請阿城（郭富城）都冇位。」城城係都幫城嫂套《花田》救亡先啦！
贏足幾條街
《花田囍事 2010》和《 72家租客》同步上映。《花田》開頭係威係勢，但宣傳同口碑明顯高一班嘅《 72家》四日已收過千萬輕易拋離對手，而其他西片同新片亦陸續追貼，黃百鳴如果唔忿被拋離真係要再諗計喇。
截至 22日為止，賀歲片票房走勢：
《 72家租客》（ 11日上映）$2,345萬
《花田囍事 2010》（ 11日上映）$1,376萬
《波西傑克森：神火之賊》（ 11日上映）$1,314萬
《全城熱戀熱辣辣》（ 18日上映）$176萬
《花田囍事 2010》
《全城熱戀熱辣辣》
撰文、採訪、攝影：娛樂組
壹傳媒互動有限公司 版權所有 不得轉載
