高海寧胸贏梁政珏

咦，好嘢嚟喎！設計對白
高海寧呢邊！設計對白
呢邊呢邊……設計對白

FBI File

高海寧胸贏梁政珏

2010年02月10日
法拉改行實力派又疑似已婚、徐淑敏又嫁埋畀口水佬黃浩等生，啱晒位畀電視台咪精新勢力上！
上星期四（ 4日），邵氏部《 72家租客》搞首映， TVB全台藝員齊撐。加埋學友、靚靚等主角頂住，唔出啲法寶，真係隨時變蛋散。 33D高海寧就醒嘞， deep V上陣谷兩球，連見慣大場面嘅阿叻同俾女圍慣嘅監製錢國偉都忍唔住。但 FBI最唔明嘅，就係高海寧嘅新咪精死敵、《 72家租客》入面着 bikini嘅梁政珏偏偏着住件包到上頸嘅斗篷出現，全場攝記當佢透明。
老老實實，觀眾認梁政珏個胸多過認佢個名，佢個珏（音：角）字仲十居其九讀錯，連最為人熟悉嘅咪咪都收埋，真係好難怪俾人㩒住砌！
上星期四（ 4日）《 72》片午夜首映，打出個心口嘅高海寧去到邊都俾記者圍住影，而紮到隻糉咁嘅梁政珏就冇人理，明明企埋一齊，班攝影大佬鏡頭都係傾側去高海寧嗰邊，搞到梁小姐塊面黑過件衫。

高海寧喺人海中成為最想攬嘅水泡，佢身邊嘅阿叻仲望佢望到眼甘甘。原本企喺高海寧身邊嘅梁政珏冇癮即閃。



《 72家》賣肉
喺電影《 72家租客》入面，高海寧同梁政珏都要着比堅尼賣肉，連無綫都知佢哋市場定位，梁政珏冇理由唔醒目啫。



輸畀欣宜
可惜無論你點露，奀星底始終洗唔甩，到大合照時，高海寧同梁政珏（箭嘴）齊齊俾人打落後排輸蝕位置，反而乜都唔使做嘅欣宜，就俾樂小姐拉佢埋中間同學友、志偉一齊企。



右上：山頂寧


撰文、採訪、攝影： FBI　
報料熱線： 2623 9178

邊青從良 梁烈唯同居女友曝光

甜筒兩份食
唯唯同女友 Tina去完街，返屋企前先去便利店買零食，行返屋企途中仲急不及待一支甜筒兩份食，有如老夫老妻。

住家菜

邊青從良　梁烈唯同居女友曝光

2010年02月10日
《五味人生》啱啱大結局，睇米雪扮低 B妹嚇親、郭晉安冇驚喜悶親，反而梁烈唯劇中演有錢仔又周不時彈兩句英文嘅勝天，最 fresh！
入行 12年的梁烈唯（唯唯），經常做乖仔、好細佬大茄角色，原來初入行嘅唯唯，實情係邊青一名，群埋唔少猛料人。好在女友 Tina帶唯唯入「正途」，如今二人發展到同居地步，其女友 Tina亦屬半個圈中人，一直任應采兒助手。上週四兩人一支甜筒兩份擔，返回赤柱公屋竇，青菜白飯，邊青都變住家男。

05年應采兒因藏毒而鬧上法庭， Tina（左）已經陪實應采兒。《蘋果日報》圖片


梁烈唯雖從未擔大旗上一線，不過多勞多得好襟撈，單係去年已拍了 6部劇，《五味人生》剛完，接住上的《老公萬歲》又有佢份，變身多撈大茄。

群過黑幫

猛料契姐
咪睇蜢嫂周雪芳一個女人仔斯斯文文，其實係財務公司話事人，唯唯唔怕俾人蝦喎！


30歲的梁烈唯， 99年憑電影《監獄風雲之少年犯》入行，戲中攞正牌做少年監犯，梁烈唯做得入型入格，皆因身邊不少猛料人。「唯唯細個嗰時都壞過，未至於係出嚟行古惑仔，不過都係無所事事周街 hea，加上佢識唔少『勁人』，好似蔡一智老婆周雪芳就係佢契姐，好多人都知周雪芳以前有個勢力人士黃桂南前夫，加上周雪芳又開收數公司。唯唯嗰時成日群佢哋玩，佢讀完中五就冇再讀書，當年佢又煙又酒，又唔知自己想做乜， hea足年幾。」知情人士說。
唯唯入咗無綫後，因口甜舌滑，多年來博得唔少演員和監製歡心。「唯唯份人好搞笑，把口仲好識氹人，唔少同佢合作過嘅演員都對佢有讚冇彈，伍姑娘、胡定欣、楊秀惠仲做埋老友添，佢係眾人契細佬！」

儲老婆本

助唯唯脫離邊青一族的，多得唯唯現任女友 Tina。據知二人拍拖多年，而 Tina更是應采兒助手。「佢哋拍咗拖好多年，感情好好，當年孫耀威同丁丁（應采兒）拍拖，都係由佢哋做媒人咋。唯唯雖然成日口花花，不過佢對愛情就好專一。 Tina本身係乖乖女，加上好鬼 cute冇乜機心，身材仲好好，佢帶番好唯唯，成日提佢要珍惜喺無綫發展、要生性。唯唯家叫做生性，都係多得 Tina。」
邊青從良，梁烈唯週日對本刊鬼馬自白：「我唔算邊青啦，中五畢業後做過銀行文職 o架……不過之後入咗行，以為群得嗰啲人多，對拍戲有着數啫！同時間我識咗我女朋友，算係俾佢改造咗啦，我自己都有醒覺，個人識諗咗囉！我哋拍咗 7年拖喇，俾你哋影到冇所謂啦！我家儲緊錢，一半係老婆本，另一半係想屋企人生活好啲！」下週日（ 14日）應采兒到賭城結婚， Tina會做陪嫁姊妹，睇嚟好快佢做「唯嫂」啦！

推門畀女入
唯唯冇獨食，自己咬多兩啖即畀女友食，再行先一步為女友開門，住屋邨都表現出男人嘅風度。



二人位於赤柱的公屋愛巢，雖然唔係豪宅，不過位於富貴區赤柱，環境一流，唯唯住屋邨都一樣有 taste喎！



認定身份
08年 1月陳敏之生日 party，唯唯已經帶埋 Tina（左）出席，只不過當時冇人知道 Tina身份，實情兩人關係在朋友間早已認 Tina為「唯嫂」。《壹週刊》圖片

洗底工程

唯唯 20歲入行，由於初時外表 MK，而且係新仔一名，所以飾演嘅角色都係古惑仔。不過隨住 Tina嘅幫忙，唯唯已經由古惑仔變住家男，無論形象健康入屋之外，連唯唯本人都健康晒，認真係古惑仔大翻身！

電影行古惑

唯唯（中）第一部電影即做古惑仔，入型入格，嗰時得 20歲嘅佢，最鍾意埋江湖人堆扮吓勁。



以前嘅唯唯，又煙又酒又愛蒲，咁樣一個古惑仔，唔改吓點會有位上呀？

電視好入屋

緊接《五味人生》嘅《老公萬歲》又有唯唯份，雖然仲未有得擔正，不過 keep住曝光，要彈起唔難吖！《蘋果日報》圖片



《五味人生》啱啱播完，收視叫做可以，唯唯今次角色仲幾重戲分，算係不過不失啦！

女人湯圓

唯唯演開嘅角色都係精靈、形象健康男孩，深得少女歡心。佢本人一樣勁開朗，所以人緣甚佳！賣口乖連伍姑娘都冧得掂當佢契細佬，而且甚少緋聞， Tina放心晒！





廖碧兒
近期拍《 72家租客》的廖碧兒，直情當唯唯細佬咁錫！



伍詠薇
伍姑娘因《緣來自有機》認識唯唯，之後二人即成為好友。



楊秀惠
由初出道嘅《擁抱每一刻花火》已經有對手戲嘅楊秀惠，點會同唯唯唔 friend呀？



胡定欣
男仔頭性格嘅胡定欣視唯唯做兄弟 o架！


撰文：娛樂組
攝影：娛樂突發組

被屈冇家教 陳法拉反插諸葛梓岐扮細

選美（年紀）冇得呃！(真實對白)
法拉上週五（ 5日）聽到諸葛梓岐老過自己時，忍唔住擘大口笑到咔咔聲，仲要用手揞住免失儀態，由個心度笑出嚟。

先撩者賤

被屈冇家教　陳法拉反插諸葛梓岐扮細

2010年02月10日
一向低調處理與 Neway大少薛世恆戀情的陳法拉，連日來俾另一位薛家準新抱諸葛梓岐追住打，盛傳諸葛公主先向相熟傳媒放料踢爆法拉於美國秘密結婚，又話新年會問未來大嫂攞利是，不過就話「唔敢叫佢大嫂，費事叫老咗佢！」咬住唔放。
俾未來「妯娌」迫埋牆，法拉亦唔見得好蝦，針對弱點攻擊，一針見血「夭」中自稱 26歲的諸葛公主報細年齡痛腳，上週五對本刊揞嘴偷笑：「哈哈哈，我哋選美出身，白紙黑字（年紀）呃唔到人！」擺明反咬快將 31歲的諸葛公主一啖。

我唔再回應喇！(真實對白)
大少奶還擊，未來二少奶諸葛梓岐週日（ 7日）出席活動時一聽見本刊記者就法拉恥笑佢扮細，諸葛公主即時笑容僵硬說：「唔好意思，我唔回應喇！」恭喜法拉中咗。


27歲陳法拉與 Neway薛家大公子薛世恆拍拖 4年一直低調，每次接受訪問都只講公事，唔會靠緋聞博宣傳。

法拉：佢大過我

被人「恰」唔出聲只會被人㩒住打。經常將男友、 Neway二太子薛嘉麟掛喺口邊，跟某雜誌關係要好的諸葛梓岐，上月尾無故擺法拉上枱，涉嫌向傳媒爆料話法拉跟男友已秘密於美國私訂終身，又話法拉屈老公送千萬大屋，清純花旦變貪錢人妻。
放料人呼之欲出，諸葛仲要在公開活動爆陰毒，明講自己農曆年會去薛老太屋企拜年，實質暗寸法拉「思」縮冇家教。卒之辣㷫法拉八婆反擊，上週五（ 5日）法拉回應諸葛話驚叫佢做大嫂會叫老佢時，繼續還拖：「我係老過佢吖嘛，佢 26我 27，我哋選美出身，白紙黑字（年紀）呃唔到人！（其實佢就快 31歲（真實年齡）喇！）吓？哈哈哈，唔係呀嘛？我真係唔知佢大過我喎！」轉走實力路線的法拉，暗寸工夫一流。

19/1法拉火燒心實錄
死喇！又唔記得對白添！設計對白
收得工未呀？我就嚟頂唔住喇！設計對白



Honey，俾人踢爆點算好呀？設計對白

狂 NG累琴姐

無端被爆陰毒，搞到法拉近日神不守舍，據知被爆婚訊兩日後（本月 4日），焗住要為《公主嫁到》返無綫開工的法拉，全晚表現不在狀態，每組鏡頭最少 NG兩、三次，唔使埋位時又顧住講電話唔睇劇本，原本凌晨 3點收廠，結果過晒鐘都拍唔完，同平時甚少 NG的法拉直頭兩個樣。
累街坊遲收工，法拉因此辣㷫《公》劇監製梅小青：「小青姐知道套劇 over run，第二日即刻落 order，話要『 cher』爆班演員，唔可以再甩期！」知情人士透露。 27歲法拉就話襟捱，難為同場的 78歲李香琴，原本已經要日踩 10粒鐘做到暈，家俾法拉拖一拖，每晚起碼唞少幾個鐘。呢次諸葛公主曲線累埋琴姐，琴姐唔好怪錯法拉呀！

駁火時間表︰ 19/1同場唔交戲
會去男友屋企拜年！
未來奶奶？邊位？
法拉同諸葛做商場騷同場表現疏離，寧願黐住唔熟絡的林莉，有心病連戲都懶得交，諸葛主動出擊話自己新年會去薛家拜年。



2/2諸葛先爆料
祝佢幸福快樂！呢件係開心事，總之要尊重老人家！
有雜誌爆法拉同薛大少秘密註冊結婚，諸葛又再強調一定會去薛家拜年，暗寸法拉唔孝順同冇家教。



3/2電話呻被屈
罵戰白熱化，兩人於同日齊齊發功，鬥寸反擊。



3/2插多一刀
如果自己結婚一定唔會秘密！我唔敢嗌佢大嫂，驚叫老佢！我會問佢攞利是，冇所謂啦，都係派錢！



7/2二少硬撐︰我唔再回應喇！
諸葛週日出席活動獲男友罕有到場支持，即刻收口唔再搞事。

真假公主

諸葛梓岐自稱為諸葛孔明第 63代後人，人前人後擺出公主姿態，更經常爆出「男友可以冇，但工人唔可以冇」等驚人金句，相比起出身音樂世家、叻到考到獎學金的法拉，講吹水，真係唔夠公主嚟。

諸葛梓岐（ Marie）



陳法拉（ Fala）

細少爭贏

法拉同諸葛梓岐日日開火，兩位薛家少爺亦要在家族爭寵爭上位。本來大少薛世恆會接手家族市值超過廿億的業務，但後來因卡拉 OK裝修費嚴重超支而被父親薛濟傑削權，去年退休時更改為欽點二少薛嘉麟接棒，成為上市公司中星集團（ Neway Group）主席，大少只能坐歪做中星旗下一間公司的董事。

薛嘉麟

諸葛梓岐同二少拍拖拍得高調，經常被影到孖公仔出巡，可惜二少唔知與「針」同眠。《蘋果日報》圖片


年齡： 31
學歷：中文大學市場拓展碩士
職銜：中星集團主席

薛世恆

有傳法拉因拍劇太搏太性感，令薛家兩老不滿，不過法拉與大少拍拖 4年依然恩愛，不時撐枱腳。


年齡： 32
學歷：澳洲新南威爾斯大學電腦系學士
職銜：中星集團旗下的新時代娛樂董事
撰文、採訪：娛樂組
攝影：楊學

《 72家》 cheap爆 3奀茄扮學友呃觀眾

你就好啦，咁準時收工！設計對白
戲中學友係志偉情敵，其中一幕學友扮患睾丸癌，叫靚靚請佢食飯，搞到志偉幻想佢哋有路，所以學友個樣咁鹹濕。

算到盡

《 72家》 cheap爆　 3奀茄扮學友呃觀眾

2010年02月10日
億億聲《阿凡達》威到盡，難得賀歲檔冇乜勁西片頂住，兩大港產貨《 72家租客》同《花田囍事 2010》自然成為黃金檔期焦點。
埋單票房邊個贏未知，但本刊發現邵氏揼錢、無綫話事的《 72家租客》為求慳皮，竟然連藝員訓練班的奀茄都要一人分飾幾角，咁都未算，為免有報道指收足 300萬片酬的學友，要超時 OT補水，無綫竟然安排三名奀茄做學友背影替身，慳皮慳到盡。碌盡人情咭的監製曾志偉亦坦承：「（學友）逐個鐘計好貴 o架！」替身扮天王，受騙觀眾呻笨，代價仲貴呀！




無綫今次由曾志偉揸旗做監製，實情一腳踢的《 72家租客》，志偉出盡力碌人情咭，搵學友同袁詠儀等好友助陣擔正，而無綫亦實行用人海戰術小生花旦傾巢而出，實行數星都數死你。

逐個鐘計好貴 o架！設計對白
片酬高企嘅張學友每分鐘都係錢，為控制成本，身為《 72家》監製曾志偉承認有用替身扮學友。

四個假學友場口

志偉點名 3個 TVB訓練班畢業生做學友替身，頂學友背脊及大側面鏡頭，大家不妨實有冇穿崩。


1學友在醫院呃志偉自己有睪丸癌
2與袁詠儀於雲吞麵鋪對坐
3在志偉家中飲曱甴酒
4海天堂鋪內跟曾志偉研究對抗加租方法

三大替身

替身(1)號：羅鈞滿
拍之前藝員部已經安排我見導演，我做學友替身都拍咗 7至 8日戲，每日朝早 9點 on call，到凌晨一點先埋位，拍完都 3、 4點啦，我仲做埋徐子珊助手同 sales添。
替身(2)號：楊潮凱
有晚拍緊 TVB劇，漏夜收到公司 call，話要即刻過去舊邵氏片場開工，我喺醫院嗰幕雖然背住鏡頭做學友替身，都同志偉對戲 o架，拍咗一日我仲有做路人甲同電器鋪售貨員 o架。
替身(3)號：鄭詠謙
我拍咗一日啫，第一次拍電影真係好開心，因為同拍電視劇好唔同，我就喺海天堂嗰場戲做學友背面替身，之後仲做埋 Laughing哥助手添。

替身(1)號：羅鈞滿



替身(2)號：楊潮凱



替身(3)號：鄭詠謙

隨時候命

但呢套自稱 3,000萬製作費的賀歲大片，除之前已有傳無綫為慳錢，演員開工後只收到「無言感激」兼幾百蚊車馬費利是，又喺片尾將賀年歌〈歡樂年年〉改晒贊助名吸水算到盡外，本刊更發現無綫為免收足酬金的學友要超時再補水，故專登搵咗三個無綫藝員訓練班奀茄做學友替身兼路人甲乙丙，一雞兩味慳到盡。據知情者說：「學友梗係跟合約辦事啦，無綫好似只係同佢簽咗十幾組戲，套戲佢又由頭帶到落尾，時間根本好緊迫，如果一超時又要加錢，所以無綫諗到搵替身頂學友拍一啲背脊 shot囉，最絕係除咗要做替身，佢哋仲做埋老臨，分分鐘孭住 2至 3個角色，慳到咁都算少有囉！」

「唔想學友辛苦」

學友出名好老豆，就算拍戲都要抽時間陪女，拍通宵確係好難捱。《忽然 1周》圖片


雖然替身最後出鏡每場只有一兩秒，但實情大茄們一樣要等打燈要 NG，一個 shot分分鐘拍成 2、 3個鐘，如果真係學友落場，下下超時條數確實好襟計。其中有份飾演替身的無綫演員羅鈞滿亦承認說：「我都拍咗 7、 8日戲 o架，由朝早 4點 on call，等到凌晨 1點先開工，到拍完都 3、 4點啦。」
上週四（ 4日）《 72家租客》舉行首映導演葉念琛堅持冇用替身，但志偉則說：「我都係唔想學友太辛苦，所以喺 TVB搵咗幾個 o靚仔幫手啫！」至週五，曾志偉直認搵替身為慳錢：「學友超時逐個鐘計好貴 o架，我係監製都要控制成本 o架，其實呢個替身制度喺荷里活好流行，叫 standman，好普通啫！（聽講學友要返屋企湊女，所以冇拍通宵戲喎？）哦，呢樣係我哋主動 offer畀佢，等佢唔使咁辛苦啫！」係喎，學友拍得舒服，無綫又慳到錢，雙贏啦！

群星扮醜爆笑

《 72家租客》雖則慳皮，不過勝在班明星肯拍膊頭，劇情講張學友和志偉年少時爭溝袁詠儀（小桃紅），最後志偉爭贏而學友則懷恨在心，處處搞對抗，劇情雖然老套，不過有群星齊扮騎呢都算有新鮮感，總之熱熱鬧鬧夠過年 feel啦！

屙尿爭女

陳法拉飾年青版靚靚（水桃紅），為爭女飾演少年志偉嘅側田（左）同少年學友林峯（右）屙尿鬥遠，結果林峯輸埋條女。

左：好！就鬥射尿，射得最遠就可以娶小桃紅。
右：怕你呀，你都未贏過！

買電話送女

學友間手機店「頂太 Phone」推出買手機送試機服務員，呂慧儀做手機 PR、俾鹹濕佬林雪試用。

左：呢部電話有 800萬像素，你試吓影我靚唔靚！
右：好清楚……夠靚喇！

惡死阿佘

視后佘詩曼都有份客串 5分鐘做惡死包租婆，催交租惡形惡相入晒戲，講嘢仲要毒過元秋。

你哋班廢柴，家我畀條生路你哋，一係交租、二係搬咗都要交租，三係死咗都要攞帛金返來交租。

肥妹扮阿媽

欣宜扮番媽咪肥姐嘅經典上海婆造型，佢喺街邊洗衫結果搞到成身濕晒，唔知點解午夜場觀眾見佢濕身就笑得好開心。

洗衫呀，樓上閂水喉呀！

其餘搞鬼串星

何韻詩飾頂太 Phone售貨員
係張學友條 o靚，負責唱兩首歌過鏡。



吳卓羲飾開 phone府售貨員
大近視，係志偉手機鋪「開 phone府」員工，後出賣志偉過檔學友間「頂太 Phone」。



廖碧兒飾哨牙魚蛋妹
強項每星期唧魚蛋 3萬粒

高志森：盡責演員會免費拍埋！

高志森


志偉話學友 OT好重皮，一向有拍開賀歲片嘅高志森導演就話：「電影一組戲大約 9至 12個鐘不等，視乎合約需要而定，連由出門口開始計定係埋位先計都會寫清楚。如果超時一般要補水，有時為咗慳錢，一啲背面或 wide shot搵替身幫手都好普遍，不過有啲盡責嘅演員為咗效果好，都會免費拍埋佢嘅。」

無綫封殺《花田》冇運行

《 72家租客》同《花田囍事 2010》新年對撼，無綫自己有電視巨大平台本來已經有優勢，加上出埋禁制對家演員如古天樂等做訪問，搞到《花田》老闆黃百鳴起晒火鬧：「估唔到無綫咁大個台都做埋咁嘅嘢。」套戲未上已好有火。

最後宣傳
據知學友除咗收足錢外，亦規定埋宣傳次數，而上週四（ 4日）所舉行的首映夜，就係學友最後為《 72家》宣傳活動，難怪有線同無綫一齊做學友訪問，無綫都要焗受。



姐仔頂
學友完成責任，難怪由上週五開始，《 72家》宣傳，全由志偉帶住班無綫姐仔頂上。



涉抄橋
戲中鍾嘉欣扮葉問打詠春，咁啱《花》片內亦有一場古天樂一打十場面，故惹來黃百鳴鬧志偉抄橋。







《壹週刊》圖片


我問點解《東張》唔做我哋訪問，佢哋話改革緊，所以冇時間播其他電影，上次愉景新城個活動，都係我哋出錢請無綫隊 crew嚟，當畀宣傳費囉，我估唔到無綫咁大個台都做埋咁嘅嘢啫。真實對白

早前無綫下令《東張西望》唔准做《花》片嘅任何訪問，封殺晒所有在無綫出鏡機會，連早前愉景新城個記招，都要出錢請先到。

觀眾超受落

為爭票房，《 72家》上週六、日搞咗兩晚優先場，雖然尾場多吉位，但週六晚 10時正於旺角朗豪坊首場爆滿，而且觀眾反應不錯，個個話唔覺有替身，由頭笑到落尾。

上週六凌晨 12時旺角朗豪坊 UA有《 72家》午夜場做，不過到當晚 11:30都係得十幾人買飛。



周先生， 23歲，客戶服務員
最好笑係中段，朱咪咪、馬蹄露扮老模，又漏雪糕、又嘔奶、又刷牙。



江先生 22歲，學生
臨尾唱歌最好笑，靚靚用辣椒油當 lip gloss夠抵死。



陳小姐， 23歲，文員
學友扮番自己唱〈愛是永恆〉最好笑，林雪冧呂慧儀嗰段都好搞鬼。


撰文、攝影：娛樂組