攞埋冊子走
睇咗半個鐘，林莉臨走時還拿着百萬廚櫃組合的宣傳冊子返屋企慢慢揀。
娛樂頂點
富豪下令低調焗呻窮 林莉為新居秘睇百萬廚櫃
2010年02月19日05年港姐季軍林莉，早前被指與內地金融業富商 W君拍拖，不時出入男友比華利山豪華別墅，又有 200萬馬莎拉蒂接送，更被影到一粒鐘豪掃 60萬名牌，富貴又風騷。
不過近日林莉忽然向外呻窮，話自己只租住八千蚊深井五百呎單位，出入迫地鐵。瞬間變窮，令人稱奇。突然呻窮，據知是因她早前高調富泰，引起內地富商男友不滿，落令要她低調。
林莉把口話窮，但其實兩星期前本刊影到佢到跑馬地秘密睇百萬廚櫃，為新居揀定心頭好。
互動片段
林莉睇百萬廚櫃
30歲的林莉，因外貌氣質跟林志玲有幾分相似，半年前被內地金融業富商狂追， W君更以幕後老細身份，一擲千萬開設「 VIP經理人公司」，只捧女友林莉一個 model，讓她不用在無綫坐冷板櫈。
衰高調富商詐型
林莉富商男友身家億億聲，生意遍及全中國，為免身份被揭，一直只當模特兒公司隱形老細，就連在港的比華利山別墅及跑車亦只用公司登記，相當小心。相反有大水喉男友射住的林莉，因經常高調到名店掃貨，又不避嫌坐二百萬名車出入，引起傳媒追訪。結果惹來內地金龜男友不滿，勒令要她低調。知情者說：「林莉好少喺朋友面前提佢男友，直至最近先聽佢呻話男友詐型，不滿佢成日俾人影到，佢男友驚好似之前同葉翠翠拍拖嘅內地富商黃友龍咁，俾人起晒底，所以落令要佢低調，連之前接載佢出入嘅馬莎拉蒂跑車都唔准佢再用，免得太張揚，所以林莉咪喺記者面前做騷話自己好窮囉。」
不過未呻窮之前兩星期（ 1月 28日），林莉被本刊發現她秘密到跑馬地國際名牌廚具專門店 Boffi睇廚櫃。該店出售的廚櫃大部分都過百萬，去年蒙嘉慧與鄭伊健搬進淺水灣千萬愛巢時，就被傳媒發現在該店訂購百萬廚櫃組合，數年前娛圈富婆關之琳亦曾在 Boffi買廿萬雪櫃。
林莉一入 Boffi，便邊看邊向店內 sales查問，又在店內跟同行的經理人商量如何擺放。據知林莉早前曾向友人透露有意買樓，今趟又被發現睇百萬廚櫃，有大水喉男友射住，睇嚟林莉即將當豪宅業主。
到 Boffi睇廚櫃
上月 28日中午，林莉與女經理人同行到跑馬地名牌廚具店 Boffi，對店內過百萬的廚櫃組合非常有興趣，不斷詢問店員意見。
指手劃腳
有大水喉男友照住，林莉睇貴價廚具睇到指手劃腳，同經理人商量怎樣擺放。
貧富懸殊
未跟內地富商拍拖前，林莉開工出入都係搭地鐵同坐巴士，非常慳家。
自去年底有富貴男友照住，林莉出入有 200萬馬莎拉蒂接送，仲有埋司機用，非常富貴。
林莉：我想買樓
要鉗實內地金龜，細心體貼唔少得，深明此道的林莉，之後再到銅鑼灣利園 Gucci幫男友揀衫。雖然最終一件衫都睇唔啱，但都買了一個千多元嘅男裝鎖匙包。
對於富貴睇百萬廚櫃，林莉在電話中死撐：「我睇吓啫，點買得起。（係咪幫男友比華利山豪宅搞裝修？）我依家都無男友！我好鍾意睇吓啲靚嘢，咁樣先刺激我俾心機工作賺錢，因為今年好希望可以買到樓。（富商男友俾錢買？）我會靠自己，自從我轉咗依家間公司，工作量真係多咗。（但我哋又見到你睇男裝衫同買鎖匙包！）我想送新年禮物俾細佬啫。」
至於有傳被內地男友下令要低調，林莉繼續耍太極：「追我嘅人就有，男友就無，所以無人落令叫我低調。不過呢排成日俾人影到，我都好想低調吓。」
點講都好啦，總之前車可鑑，與她同屆港姐冠軍葉翠翠及亞軍陸詩韻，都係因為衰高調才被金龜狠飛，林莉唔想步佢哋後塵，都係時候做低調富婆。
睇 Gucci男裝
睇完百萬廚櫃，林莉轉到銅鑼灣利園行 Gucci，不過佢唔係幫自己入貨，而係幫男友揀衫，且專攻近萬元大褸，她所睇是 53號尺碼，相信她的內地金龜身材屬高大之人。
買男裝匙包
雖然男裝衫揀唔啱，但林莉最後亦買了一個千多元的男裝黑色鎖匙包。
富貴 high tea
買完禮物，唔使開工嘅林莉十足闊太，同經理人去番跑馬地馬會 high tea。因男友落令低調，無得再坐馬莎拉蒂，故當日林莉已改坐普通保母車出入。其間林莉發現有記者跟蹤，即刻着司機撇甩採訪車。
一屆三傑
林莉跟葉翠翠、陸詩韻同是 05年三甲港姐，三人竟不約而同情傾內地金龜。可惜葉翠翠和陸詩韻均因太高調而被內地金龜狠飛，唔知林莉同大水喉男友又可以維持幾耐？
冠軍葉翠翠 08年 4月與從事地產生意的內地富商黃有龍撻着，拍拖唔夠三個月已火速答應對方求婚。同年 5月葉翠翠豪擲 3,100萬連掃兩個賽西湖千多呎單位。可惜拍拖 4個月，就被趙薇撬牆腳。《壹週刊》圖片
亞軍陸詩韻 08年 5月與有油王稱號的內地富商朱明拍拖，隨即搬入月租 10萬的銅鑼灣豪華酒店式公寓 Apartment O。不過，朱明最後飛甩陸詩韻與陳法蓉拍拖，陸詩韻便搬回將軍澳居屋。
撰文：娛樂組
攝影：攝影組
壹傳媒互動有限公司 版權所有 不得轉載
TVB Channel http://www.tvbchannel.com
