人哋點睇人哋事！
隔空傳情︰對於和郭政鴻秘密復合，滕麗名講到明唔會理人點睇，更指對方是超好男人，名份名聲統統放在一旁。
封面故事
滕麗名癡戀郭政鴻 甘做第三者
2010年02月12日去年 9月，本刊踢爆 45歲郭政鴻與一貌似他前妻的女人同居，更生埋個九個月大女兒。而經常與郭政鴻糖黐豆，被全世界認定係他正印女友的滕麗名當時心死說：「我同佢畫清界線！」
以為滕、郭二人從此各行各路，殊不知未夠半年，竟然又秘密翻兜復合。本刊收到消息，指上月初他們拍住拖出席一位無綫導演的婚禮，全程一齊坐猶如孖公仔，影大合照時，郭政鴻更加鬼鬼祟祟欲避鏡頭。事後滕麗名表明自己懶理世俗眼光，對記者說：「人哋點睇人哋嘅事，總之我覺得佢係一個超好男人。」
上月 9日，無綫導演程嘉傑在灣仔合和中心皇廷酒樓結婚擺酒，由於新郎在無綫工作多年，與不少藝員熟絡，因此結婚當日，多位無綫藝人俾面出席，星光熠熠儼如小型台慶。當晚新郎新娘本應是全場焦點，但當滕麗名繑實郭政鴻現身時，全場目光即時聚焦在二人身上。
當記者指她曾一度表明要和對方畫清界線，滕麗名即緊張地指住記者筆記簿說：「我冇講過，你唔好亂寫。」
滕麗名係個好女人！
得知滕麗名稱讚自己是超好男人，郭政鴻即會心微笑說：「佢都係好女人。」肉麻當有趣。
用自己相機影相
一位有份出席的嘉賓表示：「之前先話郭政鴻同個女人同居仲生咗個女，不過嗰晚見到阿滕郭政鴻拍住拖入嚟，唔止我，連我附近啲人都話奇怪。佢兩個一入嚟就走去新郎度影合照，不過佢哋好似話要用自己部相機，唔肯用大會攝影機，可能驚啲相流出去啩！之後佢哋坐埋一齊細聲講大聲笑，總之阿滕去邊郭政鴻就跟去邊，十足孖公仔一樣。到影大合照嗰陣，佢哋兩個都企埋一齊，但戴住 cap帽嘅郭政鴻就頭耷耷，好似唔想影咁，反而阿滕就大方得多。」擔心「罪證」外洩的郭政鴻，連與新郎影單人合照都要用私伙相機，可惜百密一疏，在大合照中，他和滕麗名翻撻鐵證終於曝光。
上月，無綫導演程嘉傑婚宴當晚，一眾藝人被安排影大合照，郭政鴻和滕麗名更企在新郎旁邊當眼位，戴住 cap帽的郭政鴻頭擰擰表現尷尬，反而滕表現大方，面帶微笑。
其後，郭政鴻索性耷低頭以 cap帽遮面，更一度縮喺滕麗名身後。
私自調位煙韌
據知，新郎最初擔心二人關係惡劣，因此編坐位時，將滕麗名編坐第十二圍，與湯盈盈等藝人一齊坐，至於郭政鴻則被編坐較後位置的二十二圍，但到埋席時，郭政鴻卻黐實滕麗名孖住坐第十二圍。
周二（ 9日），本刊致電導演程嘉傑時，對於安排座位，他說：「佢哋都係我嘅朋友，都希望做到盡善盡美。（咁係咪原本安排佢哋分開坐，但結果佢哋一齊坐？）呢啲嘢我唔方便講！」隨即匆匆收線。
去年 9月，本刊拍下正與滕麗名拍拖的郭政鴻，原來與一女子育有一個九個月大女嬰，並同居於鑽石山龍蟠苑。當日一家三口到中旅社為女兒辦理回鄉證。
上月，郭政鴻獨自到九龍灣細心選購 BB浴盆，果然廿四孝老竇。
湯盈盈爆料：佢哋除夕都一齊
周日（ 7日），滕麗名好友湯盈盈出席電影《 72家租客》宣傳活動，當晚有份出席婚宴的她爆料，指去年除夕 party已見二人喺埋一齊。「以我所知，佢哋感情都仲係好好，之前除夕 party佢哋都係一齊出嚟。而嗰晚去飲，佢兩個仲同我坐埋同一圍。（佢兩個堅持要一齊坐？）係呀！有咩問題呀？」湯盈盈答完後，即時聽到她細聲對身邊助手說：「死啦！我好似覺得自己『瀨』咗嘢！」
湯盈盈爆響口
記者問到有份出席程導演婚宴的湯盈盈，她口快快爆出滕麗名和郭政鴻除夕亦有約會後，即尷尬向身旁助手表示自己口多闖咗禍。
女方難忍寂寞
自從被本刊踢爆郭政鴻有妻女後，一度心灰意冷的滕麗名，揚言要和對方畫清界線。不過之後她卻轉口風狂讚男方是一個超級好人，更講明郭政鴻任何決定都會尊重同支持，反差之大令人震驚。據知，一直恨拍拖有人錫的滕麗名，眼見和自己拍拖 9年的魏俊傑一分手，對方轉頭便和國產小花結婚，打擊之大一直令她難以釋懷。 3年多前當他遇到郭政鴻，即被他細心穩重的性格吸引，縱使發現對方有妻有女曾一度心死斬纜，但其後依然抵不過中女寂寞，繼續和郭政鴻糾纏。
「阿滕出名死心眼，同鴻仔拍拖冇耐就諗住結婚生仔，不過爆咗鴻仔同個女人同居仲生埋女，就見佢謝晒咁。我哋都有安慰過阿滕，但係叫親佢出嚟佢都唔制，一個人匿喺屋企，不過過咗冇耐再見佢好似冇事一樣。問佢同鴻仔點？佢就話『冇事啦！總之佢對我好好，其他嘢我唔理 o架啦！』可能鴻仔番掂佢啩！」知情者說。
上周六，滕麗名所住村屋進行小型裝修，沒有郭政鴻在旁，滕麗名找來兩名男工人幫手，之後她更親自開水喉清洗樓梯。
08年滕郭二人打得火熱，滕麗名剛搬入西貢村屋（右圖）不久，本刊曾拍下郭政鴻竄上女方新居，落簾短敍。
滕麗名：我覺得開心
周一（ 8日），滕麗名出席新劇《女人最痛》拜神儀式，對於與郭政鴻翻撻，她大方承認一起去飲，還稱讚對方是超好男人，繼續維持之前嘅關係。
滕麗名：滕 記者：記
記：上個月有人見到你同郭政鴻去飲，仲一齊坐喎？
滕：（想了一想）係呀！
記：你知道佢有另一半同有個女後，唔係講過要同佢畫清界線咩？
滕：（即碌大眼）我冇講過。你唔好亂寫呀！（隨即壓低聲音）你哋點知我唔知呢？
記：你唔驚俾人話係第三者咩？
滕：我同佢係好朋友，我同佢做朋友覺得開心，人哋點睇人哋嘅事！
記：佢身邊人可能會唔開心喎？
滕：我同郭政鴻係好朋友，總之我覺得佢係超好男人，其他私人嘢你就要問番佢哋！
記：你成日同郭政鴻單獨出街 o架？
滕：係呀！朋友食飯好正常！總之我同佢關係冇變。
新劇搏盡
上周六（ 6日），身材向來不標青的滕麗名為新劇《女人最痛》谷胸上陣，拍攝一場牛奶浸浴戲份。
她出動兩個 nude bra，再一個黑 bra打底，因而谷出警鐘胸。
郭政鴻：唔提另一半
對於滕麗名猛讚自己好男人，更講明與郭政鴻關係冇變，同日夜晚郭政鴻出席節目《逐格鬥》錄影時，即回敬讚對方是好女人，二人實行隔空調情。
對於去飲宴要黐實滕麗名坐，郭政鴻即刻意大聲說：「係呀，我同佢係老死嘛！（佢讚你係好男人喎？）我係好男人，佢咪係好女人囉！（你唔驚你另一半唔開心？）我唔會理人點睇！亦唔會為咗幾句說話冇咗阿滕呢個好朋友！（上次影到你同一個女人去攞回鄉證，佢係你老婆定女朋友？）我唔會提另一半嘅嘢，我哋一早協議咗！（咁做覺唔覺得對佢唔公平？）係佢唔想公開，佢唔想落街都要俾人跟住影！（你同阿滕依家咩關係？）好朋友，由始至終都係！（你咁樣拖泥帶水，有冇諗過同時害咗兩個女人？）男女朋友嘅定義，我講你都唔明！（你呢排係咪成日同阿滕單獨約會？）吓……有咩？（阿滕親口講！）佢話有就有，朋友食飯都好正常啫！」
男方有家室又有個女， 33歲滕麗名唔顧名聲名份，照樣瞌埋眼一頭撞埋去，估唔到望落係個硬淨女強人嘅滕麗名，一樣被愛情蒙蔽。
06年滕麗名與剛失婚的郭政鴻因拍《野蠻奶奶大戰戈師奶》而撻着，雖然只肯互稱「好朋友」，但不少公開活動，兩人都表現煙韌，彼此情侶關係已是公開的秘密。
去年 9月，記者就郭政鴻有女人兼有個九個月大女嬰一事問過滕麗名，當時她激動表示要與郭畫清界線，估唔到事隔不夠半年又翻撻。
藝人揞口
被踢爆有家室的郭政鴻和滕麗名秘密復合，更雙雙現身導演婚宴，除了湯盈盈外，其餘當晚有份出席婚宴的藝人，對二人關係均不肯多言。
陳山聰：「全部都係朋友同事，嗰晚大家都係吹水講笑。話佢哋復合？唔係啩。」
阿佘：「我嚟咗 10分鐘，擺低人情同影完相就走，所以唔知佢兩個喺邊。」
Toby：「我哋成班 friend自己坐埋一齊玩，冇諗過佢哋係咪復合。」
當晚擺酒的新郎哥程嘉傑（右三），在無綫做導演超過 6年，隸屬監製梁家樹旗下，其執導劇集包括《學警雄心》系列及《富貴門》等，在無綫廣結人緣。當晚阿佘、湯盈盈和馬德鐘都俾面出席，但分批合照時，卻不見郭政鴻和滕麗名蹤影。
陳山聰
阿佘
Toby
情路多波折
郭政鴻和滕麗名雖然堅持從未與對方開始過，但 06年二人拍《野蠻奶奶大戰戈師奶》時，剛和魏俊傑分手的滕麗名即與失婚郭政鴻撻着，戲假情真。自拍拖以來多次俾人影到單獨約會和車廂激吻，外間早已認定二人是一對。可惜蜜月期過後，多次傳出二人情變分手，早前郭政鴻被本刊踢爆有妻有女，阿滕更表示要和對方畫清界線，估唔到短短數月又再次搭上，感情峰迴路轉。
蜜月期︰ 08年 3月 Blog爆戀情
二人拍拖兩年，一直保持低調，直至二人拍住拖面貼面出席戲劇組總監梁家樹大女婚宴，被阿姐汪明荃在 blog內公開照片，才令戀情曝光。
08年 4月香閨短敍
本刊拍到二人前後腳，在女方的村屋短敍，全屋更落晒窗簾，同月又被傳媒拍到二人在車廂激咀。
穩定期︰ 09年 2月公然親暱
二人被安排以情侶檔上《獎門人》，被志偉公然催婚，滕麗名雖口硬拒認拍拖，但卻不避嫌為男方抹去臉上忌廉。
冷靜期︰ 09年 7月自爆分手
滕麗名突然在 blog上自爆和「好男人」分手，問郭政鴻時，他笑笑口說：「冇分手，好朋友、好同事點會分手。」更表示有責任為她處理情緒問題：「佢話點就點……實會諗辦法令佢開心。」
混亂期︰ 09年 9月欲斷難斷
郭政鴻被本刊踢爆與前妻翻撻兼有一女兒，事後其前妻李欣穎致電本刊，表示該女人只樣貌與自己相似而非同一人。如今這位與郭政鴻誕女的女人身份依然成謎。另一方面，滕麗名又讚郭政鴻是超好男人，這三角關係頗混亂。
Blog爆戀情
香閨短敍
公然親暱
欲斷難斷
