周日（ 1月 31日），「中巴」穿着和報案時同一件恤衫接受本刊訪問，更出示崔所送嘅訂情信物——心形鎖匙吊墜手鏈。「佢送呢條鏈俾我做生日禮物。佢話條鏈好有意思，個心代表我，而鎖匙代表佢，佢話即係只得佢可以開到我個心。」
娛樂頂點
再插龜縮邦日日爛醉 中巴：我唔俾佢就打
2010年02月05日散打王崔建邦自去年尾涉嫌打女友後，一直龜縮潛水。上周五（ 29日），因要到警署續保而被迫浮上水。以往能言善辯的他，當日對住傳媒，粒聲唔敢出，相反曾被他拳打腳踢的鄺敏慧（中巴），連日來高調見人。幾乎每日見報的她更因禍得福，出騷價由幾千暴漲至三萬，短短個半月，荷包進帳接近三十萬。
中巴接受本刊專訪爆出之前從未透露嘅委屈：「佢一個禮拜飲足七日酒，飲完就發癲，試過有次鬧交，佢夾硬搶走送俾我條手鏈，我唔俾佢就打。」
穿着和報案當日同一件藍格仔裇衫的「中巴」，周日（上月 31日）接受本刊訪問，提到崔建邦時，「中巴」猶有餘悸說：「最初兩個月我同佢一齊真係好開心，不過拍咗冇耐，我開始覺得佢脾氣好大，小小嘢就發好大脾氣。佢飲酒飲得好犀利，一個禮拜飲足七日，飲醉酒佢會撞門、大吵大鬧。仲打爛晒屋企啲嘢，屋企有個櫃都係咁俾佢打凹咗。有次佢飲醉返嚟，突然衝返落街話要揸車，我話『唔好，咁樣好危險！』點知佢打咗我一巴，叫我唔好理佢，之後又嘔又瞓喺架車嘅軚盤度。試過有次同佢鬧交，佢話要攞番送俾我條手鏈，我唔俾佢就打我。」
記者問她遭打有咩感覺？「中巴」表示：「我凈係識驚，其他嘢諗唔到咁多。第二朝我都有問番佢，但佢就當冇事，話自己『斷片』乜都唔記得。其實我都有問佢點解要飲咁多酒？佢答我『做人冇乜意義，唔想自己清醒』。（你哋拍拖冇耐，崔建邦就叫你過澳門同佢過夜，覺唔覺佢猴擒？）佢話要去澳門做嘢，問我有冇興趣陪佢做騷，我都冇諗過其他嘢。」
出示訂情信物
早前，「中巴」到警署報案，指俾人打並到醫院驗傷，其後她對記者表明是崔建邦打她，自此男龜縮食穀種，女則高調銀。
「想過同佢生仔」
上周五（ 29日），正當崔建邦頭耷耷到警署報到，「中巴」則校啱時間， set靚頭化行妝到有線接受訪問。和崔建邦拍拖四個月的她，坦言曾想過和對方結婚生仔：「我好細個 daddy就走咗，我好想俾人錫俾人照顧，最初我哋有傾過第二時結婚同生 BB。佢今年三十，年紀比較大，所以好恨有小朋友，同佢拍拖冇耐，佢已經帶我去見佢屋企人同朋友。佢媽咪好鍾意我，仲話除咗我之外，冇接受過佢其他女朋友。」曾經對「中巴」錫到燶的崔建邦母親，被哎哋新袍仔反咬一啖之餘，又見個仔日日潛水唔敢蒲頭，唔心翳就假。在銅鑼灣經營車仔麵檔的崔母，以往經常坐陣店舖，但自崔建邦出事以來，崔母亦連帶失蹤，連日來只叫親妹到舖頭打點一切。
當日崔建邦乘友人車鬼祟到警署續保，被現場傳媒識穿，戴上口罩的崔建邦惟有企定定局影。
影唔夠三分鐘，崔建邦便閃上車，極速由警署後門駛走。
1月 29日男現形女狙擊
崔建邦在長沙灣警署蒲頭，咁啱撞正「中巴」到有線接受訪問，「中巴」更聲淚俱下表示對方是她一生中最愛。
崔母心翳扯煙
直至兩周前（上月 22日），崔母眼見風聲冇咁緊，才敢到舖頭睇帳目。但她逗留舖頭期間，頻頻到舖外煲煙，眉頭一直深鎖。短短一小時便扯了四支煙。數日後（ 25日），崔母再到舖頭打躉，和友人在門外煲煙吹水時，記者聽到友人勸她食少支煙，但崔母說：「我知，之前食少咗 o架啦，不過呢排好煩，唔食唔得……唉！一個係咁、兩個又係咁！」似暗示崔兄早前欠債，如今崔建邦為女搞到一身蟻。
其後，崔母搭巴士到石峽尾街市買餸。記者見她在街市內兜兜轉轉漫無目的遊逛，最後匆匆在菜檔買了一斤菜後，便搭小巴返回畢架山花園寓所。
不過，自從上周五崔建邦被傳媒發現行蹤後，崔母再度潛水不敢現身舖頭。而記者曾問崔建邦屋苑管理員，他說自從事件發生後，沒見過崔出現。
崔母愁爆
上月 25日，崔母終於現身舖頭，一面愁容的她，不時出舖外扯煙，向友人大吐苦水。
崔母之後到街市買餸，但全程渾渾噩噩漫無目的，最後買了一斤菜回家。
中巴母黑面
「中巴」在訪問中坦言母親到現在依然不相信崔建邦會打人，但日前記者在她面前提及崔建邦，她即黑面說：「唔想講！」
崔建邦甚保護自己，與「中巴」拍拖 4個月，合照都唔多張，難怪中巴話：「佢影相都要左諗右諗，好多時仲拉埋朋友一齊影。」
陳總打救
有指陳總一方面安排崔建邦返無綫復工，私底下亦聯絡老死 Paul Poon，安排崔建邦在 model公司工作。
自打女事件後，形象破產的崔建邦，手頭所有工作急叫停，財路斷米路絕的他，靠食穀種和無綫 8,000蚊底薪過活。有傳欠下大筆卡數的他，好彩有個有情有義的陳志雲射住。有指由於「中巴」暫未有進一步有力證據，崔大有機會徹銷所有控罪，近日陳總已着手步署安排崔建邦過年復工大計。據無綫工作人員透露：「公司會先試吓市場反應，唔會咁快俾 Amigo做大騷，會安排啲遊戲節目或者飲食節目等佢見吓街先。」
女人靠唔住，反而陳總幫得手。周三（ 3日）他不單代愛將否認欠債，更講明崔建邦情況好轉就會重新安排工作。
男紥炮女汲水
30歲崔建邦因形象負面，除了無綫所有節目被煞停外，更錯過聖誕、新年銀黃金機會，保守估計損失接近 40萬。相反「中巴」卻因禍得福，因被打而人氣急升。短短個半月，接多個商場騷外、上電視兼拍埋廣告，下周更到日本為廣告及日劇 casting。
廣告
1DAY ACUVUE隱形眼鏡廣告︰ 10萬
電視
接受有線《主播會客室》專訪，重提與崔建邦的戀情。錄影亞視遊戲節目《財神到》，再將「賤男」事件擺上枱。︰ 5千
中巴狂賺近 30萬
2月 2日︰為築地日本料理擔任「情人節花之戀大使」︰ 3萬1月 30日︰出席亞視《財神到》宣傳活動︰ 3萬
1月 26日︰出席夜店 Beijing Club兩周年派對︰ 3萬
1月 24日︰為海悅豪園購物商場《招財貓貓迎新春》活動擔任︰ 2萬 5千
1月 18日︰到灣仔會展欣賞 Vivienne Westwood時裝騷︰ 2萬 8千
12月 31日︰出席尖東舉行的除夕倒數活動擔任嘉賓︰ 3萬
龜縮邦失近 40萬（騷價每個 1萬）
Cut商場騷被飛出聖誕和新年 6個商場騷慶祝活動︰共失 26萬
飛出大騷
被飛出《十大勁歌金曲頒獎禮》司儀工作，改由王祖藍及鄧健泓頂替。︰失 2萬
節目暫停
J2節目《 My Name is邦》遭腰暫，改由陳偉霆及 MC Jin主持的《兄弟幫》頂上。被飛出《勁歌金曲》主持工作，改由陳志雲另一愛將鄧健泓頂替。︰失 8萬
撰文：娛樂組
攝影：攝影組
