虎年潮語
最鮮潮語測試 靚靚「止血貼」都識
2010年02月19日「潮語」已經成為今時今日人與人溝通嘅重要工具，無論你係咪「 80後」，點都要識一兩個潮語傍身。
踏入虎年網上出現咗唔少新鮮潮語，本刊搵咗十幾位圈中藝人，考考佢哋對網上潮語嘅認識。
好多藝人一睇題目就大叫「嘩！好難呀！唔識喎！」但原來愈話唔識，成績就愈好！
就連做咗阿媽嘅靚靚袁詠儀都好潮， 9題答啱 6題，連網友成日提嘅「止血貼」都識，勁！
袁詠儀唔知醜字點寫 啱 6題
以為講潮語只係一班「 80後」嘅專利？錯喇。已為人母嘅袁靚靚竟然答中 6題，佢一見到「止血貼」即時諗到係醜女咁解，衰就衰在佢突然大爆一句：「死喇，個醜字點寫？」搞到俾靚靚拉住幫手嘅伍姑娘伍詠微即場爆笑。最終個「醜」字就要搵助手代勞，認真醜死鬼！
伍姑娘恥笑
個醜字點寫呀？（真實對白）
Hotcha最有創意 啱 5題
Hotcha Regen話：「『阿凡達』？係咪話人講外星話九唔搭八呀？」 Crystal亦問：「咩止血貼呀？ M巾定棉條呀？」最後 Winkle忍唔住話：「好多都唔識，真係『杯具』喇！」三個女人一個墟嘅 Hotcha，創意比網友們有過之而無不及。 Hotcha最終答啱 5題，而且大部分答案都有例句「十卜」（ support），都算係咁喇！
左起
Winkle：真係「杯具」喇！（真實對白）
Crystal：嗚嗚嗚！
Regen：啱得 5題。（真實對白）
傅穎係潮語達人 啱 7題
平時最鍾意喺網誌上發表心事嘅 Theresa果然係潮女，整份潮語大測試只係答錯「收女」同「撈女」兩題，成績驕人。睇嚟 Theresa除咗可以出書做才女之外，仲可以開個網站同 fans用潮語溝通。
江若琳即學即用 啱 7題
「我有睇『阿凡達』喎，係咪『 I see you』呀？定係話人同外星人拍拖？啲網民都好搞笑喎！」江若琳一邊笑一邊周圍問人，多得身旁助手協助，最終成功答啱 7題，臨走前仲不忘同記者講「釘橋」。
張可頤搵幕後人代答 啱 6題
以為近期忙於拍新劇嘅張可頤對潮語一無所知，點知佢都答中 6題，事關佢身邊勁多猛人幫手。「好彩多得監製同身邊一班幕後人員提水，我先可以答到咁多題，乜依家啲人真係會講呢啲潮語 o架咩？」
喂！有冇人識答呀？（真實對白）
黃宗澤一味靠估 啱 6題
黃宗澤（ Bosco）一向都有上網嘅習慣，不過就好少瀏覽討論區，以為佢對網上潮語一知半解啦！點知佢唔聲唔聲已經完成份測試，仲話：「大部分潮語都可以照字面解，不過『白無女』同『止血貼』真係唔明係咩？太難估喇！」
止血貼係咪邪嘢嚟 o架？（真實對白）
RubberBand搶住答 啱 6題
由 5個大男隊組成嘅 RubberBand，平日夾 Band之餘都成日上網，搵佢哋做潮語測試冇難度，「收女」諗都唔使諗已經識答，喺眾志成城下，由翻版林海峰泥鯭代筆，結果答啱 6題。
王祖藍請鎗 啱 5題
唔好以為平日口多多冇時停嘅祖藍對潮語瞭如指掌，其實現實中嘅佢非常正經，例如潮語「收女」，佢就以為係天主教徒嘅「修女」，好在之後搵咗葉念琛（左）導演幫佢補答先啱 5題！
呂慧儀一知半解 啱 5題
唔好以為做過「謎女郎」嘅長腳蟹呂慧儀乜嘢謎團都識解，當日佢見到咁多個從未聽過嘅潮語時竟然「 O晒嘴」，仲創作出唔少新答案：「『阿凡達』係咪話啲超高大嘅人呀？」話時話，周家蔚答呢題嘅時候都係寫「呂慧儀」。
湯盈盈俾洪天明老點 啱 3題
鬼妹仔湯盈盈平時講中文都講唔正，網上潮語應該都唔會識，點知佢唔止識睇中文，仲識得寫部分中文，實行中英搭夠。不過佢喺洪天明不停騷擾誤導下，最終只係答啱 3題。
周家蔚做男友擋箭牌 啱 4題
記者本來係搵洪天明做呢個潮語測試，不過天明以唔識睇中文為由將呢個重任交託俾女友周家蔚。同天明一樣唔識中文嘅家蔚惟有以英文作答，當女友望住啲題目諗爆頭嘅時候，天明一句：「佢唔使人幫啦！」就行開，家蔚靠自己都答啱 4題，成績已經算唔錯喇！
寫英文得唔得呀？（真實對白）
我唔識中文 o架！（真實對白）
鍾嘉欣白無女人辨 啱 1題
華姐出身嘅嘉欣雖然係半個鬼妹仔，不過佢比湯盈盈識得更多中文字，「『止血貼』係咪膠布呀？定係 maxi pad（衛生巾）？」喺滿腦子問號下，最終只係啱 1題，係成績最差嘅一個，成為今個潮語大測試中「白無女」嘅真人示範。
我真係睇唔明。（真實對白）
標準答案
1收女
意思：一位很愛歡迎的男性，因有很多女性傾慕而自動送上門，若他接受就叫收女。
例句：情聖，最近有冇收女啊？
2撈女
意思：撈是形容魚翁撒網式的追女仔行為，不單純指追女仔。
例句：噚晚你又落 D撈女呀？撈唔撈到好嘢？
3洋扒
意思：醜的外國女人。
例句：果間 D好多鬼妹，但好多都係洋扒。
4阿凡達
意思：破紀錄的指標，好勁的意思。
例句：佢打字好快，勁過阿凡達。
5元女/仔、天女/仔、葵女/仔……
意思：以地區再細分各類型男女，元女即元朗女，天女即天水圍女，如此類推。
例句：呢位係中女，住喺中環。
6白無女
意思：白癡+無知、白癡+無聊、白癡+無情的女人……可有多個變化伸延。
例句：咁都唔知，正一白無女。
7止血貼
意思：有人在討論區貼出索女相片，索到令人流鼻血，此時有人惡搞，貼出醜女相片，令人停止流鼻血。
例句：止血貼到，幫各位止止血。
8釘橋
意思：英文 Thank you諧音。
例句：咁夜收工仲要你送我返屋企，真係釘橋！
9杯具
意思：悲劇（國語拼音悲劇與杯具相似）。
例句：土瓜灣冧樓，真係杯具！
撰文：娛樂組
攝影：攝影組
壹傳媒互動有限公司 版權所有 不得轉載
TVB Channel http://www.tvbchannel.com
ليست هناك تعليقات:
إرسال تعليق