الكتروتقني: 小生食相面面觀

الجمعة، 19 فبراير 2010

2010年02月19日

明星藝人，每次出席公開場合，例必着得靚靚示人，呢個係「職業本能」啦！不過喺現實生活，查實佢哋又咪係普通人一個，尤其電視藝員，每日喺電視城拍劇拍到天昏地暗，醫肚嘅地方同媽咪姐一樣，只有公司 canteen，放飯時間都係粒零鐘，唔理你係臨記、甘草、姐仔或小生，統統無例外。

食相可以觀人於微,哥仔姐仔,醒定啲啦!
食相可以觀人於微，哥仔姐仔，醒定啲啦！

喺電視城 canteen見到鄭嘉穎同曹永廉，平日官仔骨骨嘅鄭嘉穎，狼吞虎嚥，大口大口塞入口，咩儀態都無，反而曹永廉就斯文淡定。

另一個小生黃宗澤，三扒兩撥食咗幾啖，就拿拿聲出去空地「扯」煙，邊扯邊吹水。照咁睇黃宗澤應該煙癮大過飯癮。

中生黃日華回巢 TVB拍劇，狂呻通告混亂。呢日，兄弟苗僑偉出咗外景，佢一支公獨食，成套劇咁多人，咁都要做獨家村，真係咁火爆冇人敢埋佢身？

這邊廂黃日華獨食；呢邊廂夏萍姨一入到 canteen，個個同佢打招呼，梁建平仲立即上前幫佢孭背囊。睇嚟夏萍姨人緣真係好好。嘩，再睇真啲，夏萍姨件外套同背囊係襯埋一套 o架。估唔到七十幾歲嘅夏萍姨原來係咁 in、咁潮。